Opnuuj ’ne gesjlaagde aovindj euver Zjwamer Biejname

Op 6 april kós weer gekald, gesjtraeveld en gelache waere biej aaj foto’s en biejname oet Zjwame. Ouch haopde Herm én de MHVS op get aanvöllinge én óm de ‘richtige’ name achter versjillende biejname aan de weet te kómme. Herm Geraedts, ofwaal Herm van Pómpe Coen, moogde biej ‘Thijs en Wilma’ zón 60 luuj welkom heite. De prizzentasie begós mit ‘Ruibe duibe duib – Piet Hermans’ op ’t sjirm. V’r zoge Pitterke Spee, mit zien handjker, dae in koerierstempo nao Remunj sjeesde (ómdet d’r neet kós fietse).

 

Sjoon verhaole oet ‘de tied det ich mich nag kós keime’, wie emes ’t numde. Ouch euver de Sjäök, dae zich bliekbaar dae biejnaam ouch zelf haaj aangemaete. En Plisie Sieben reej op ’ne motor, mit in ’t ziejsjpan zienne hóndj Astra. Hein Beurskens wèt nag det zienne opa ootj in de pindraod woor geloupe en toen door Sieben in ’t ziejsjpan, naeve d’n hóndj, toes waerde gebrach. De Trekveugel woor ’n vriejgezelleclub in de jaore twintig van de veurige eeuw. Biej feeste maakde Janisse Thies meistal gedichskes, wie ouch de volgende:

Coen van ’t Aord
Dae hèlt zich altied aan zien waord
Hae wet alles op ’t gebied van gäöte en pómpe
En ouch op ’t gebied van de maedjes is hae geine lómpe

en ouch

Hand van ’t sjteine huuske
Haet ónger de naas ein puuske
Det haet d’r aaf laote sjaere
Den kós d’r mit vrieje baeter gewaere.

Waat ’n verhaole… es alles waat verteldj woort ouch opgesjreve haaj mótte waere, kwome v’r noe pepier tekort. ’t Woor opnuuj ’ne sjone aovindj, dae offisjeel toet 23.15 oer doerde…